“ શોધ”

ભટકી ભટકીને ભૂલા પડ્યા તો ય ના, આવ્યા હરિ હાથ

જોજનો દૂર પંથ વિસ્તરતો જાય કેમે ન ચરણો દે સાથ

એ ઘૂઘવતા પૂરમાં છૂપ્યા હશે કે

હશે ખળખળ વ્હેતા શીત ઝરણે ,

ફૂલોએ સ્મિત તણી આંગળી ચીંધી

ઝાકળમાં શાશ્વત પરમ ક્ષણે .

નામ એનું કોતર્યું તું પાંખે પતંગિયાની, ઉકલ્યા ન અક્ષર હે નાથ

ભટકી ભટકીને ભૂલા પડ્યા તો ય ના, આવ્યા હરિ હાથ

ચારે દિશાને પુછ્યું ને અંબરને પુછ્યું

તો બોલ્યા સૌ નામ એક, ધરતી ,

સરનામું શોધવામાં આયખું અટવાયું

હવે, અશ્રુની ધારા જાય સરતી .

મઘમઘતી માટીએ કાનમાં કહ્યું,” તારી ભીતર ભમે છે તારો ઈ નાથ”

ભટકી ભટકીને ભૂલા પડ્યા તો ય ના, આવ્યા હરિ હાથ.

નીતિન.વિ. મહેતા.